వీర శూర సీకాంగీసు నాయకులు

తప్పనిసరి పరిస్థితుల్లో రాష్ట్ర విభజనను అడ్డుకోవాల్సిన పరిస్థితి దాపురించిన సీకాంగీసు నాయకులు సోదియాను కలిసి విన్నవించుకోవాలని అనుకున్నారు. కానీ ఆమె అపాయింటుమెంటు దొరకడం లేదు. అంచేత వాళ్ళు ఆమె సెక్రెటరీ ఇంటికి వెళ్ళి, ఆమెతో తమ గోడు చెప్పుకున్నారు. ఆ ’సెక్రెటరీ’ సోదియాకు వ్యక్తిగత సహాయకురాలు - అంటే తల్లో పేలు చూట్టం, కొబ్బరినూనె రాసి తలదువ్వడం -ఇట్టాంటి పన్లు చేస్తుందన్నమాట! ఆమెకు పాపం వీళ్ల మీద జాలి కలిగి ’సర్లే, రేపు డ్యూటీకి వెళ్ళినపుడు ఆమెతో మాట్టాడతాలే’ అని అభయమిచ్చింది. మరసటిరోజు సెక్రెటరీ సోదియాతో మాట్టాడుతోంది..


సీకాంగీసు నాయకులు మిమ్మల్ని కలవాలంటున్నారు మేడం.
నేను లేను.
ఉన్నారుగా!!
లేనని చెప్పు.
ఎలాగైనా తమను కలిసే అవకాశమిమ్మని నా కాళ్ళపై పడి మీ కాళ్లనుకోమన్నారండి.
ఛత్, కలవనన్నానని చెప్పు
ఎందుకు?
ఉప్మా తినాలనుకుంటున్నాను, అందుకని.
ఉప్మా తినాలంటే కలవడం మానెయ్యాలా?
ఇప్పుడు ఉప్మా చెయ్యడం నేర్చుకుని సరిగ్గా తయారుచేసుకునేటప్పటికి ఇవ్వాళంతా పట్టేట్టుంది.
మరి రేపు రమ్మని చెప్పనా?
వద్దు.
ఏం?
రేపు పెసరట్టు తినాలనుంది.
ఎల్లుండి?
ఎహె.. ఏంటీ హింస? ఇది నా పార్టీ, వాళ్ళు నా సేవకులు. నాయిష్టం, నాకు కలవాలనిపిస్తే కలుస్తాను, లేకపోతే కలవను. వాళ్ళకు కారణాలు చెప్పాల్సిన అవసరం నాకు లేదు.
కారణం చెప్పక్కర్లేదు, కనీసం వాళ్లకో ఎస్సెమ్మెస్సన్నా పంపిచ్చొచ్చుగా మేడం?
నా ఫోను డెడ్డైంది.

సరిగ్గా అప్పుడే అహ్మద్ పాటిల్ నుంచి ఎస్సెమ్మెస్సు వచ్చింది. రాగానే, వచ్చినట్టు మోత కూడా వచ్చింది. అది విన్న సెక్రెటరీ సాభిప్రాయంగా సోదియా వంక చూసింది. సోదియా గబుక్కున మొహం తిప్పుకుని ఆ ఎస్సెమ్మెస్సు చదువుకుంది. దాని సారాంశమిది: "నేను మీకు ఎస్సెమ్మెస్సు పంపేసానని ఆ సీకాంగీసు సన్నాసులకు చెప్పాను. ఇక మీరు ఉప్మా తిననక్కర్లేదు"

సెక్రెటరీ మళ్ళీ అందుకుంది.. ’అబద్ధం చెప్పడం ఎంత తేలికో నిజం దాచడం అంత కష్టం మేడం’.
నోర్ముయ్, నేనేం దాచడం లేదు. అయినా, ఆ సీకాంగీసు లేమైనా పోటుగాళ్ళా ఏంది? వచ్చే ఎన్నికల్లో గెలిచే మొహం ఒక్ఖటైనా ఉందా వాళ్ళలో? ఈ పుచ్చొంకాయలను కలిసేదేంటి? మా రౌలు బాబుకు కాస్తో కూస్తో సపోర్టు దొరికేది తెకాంగీసు తోటే! 
అసలు వీళ్లకి పదేసి మంత్రి పదవులు పారేసింది ఎందుకూ..నోర్మూసుకుని పడి ఉంటామని చెబితేనే గదా! ఇప్పుడేంటిది? నోరిప్పితే వాత పెడతానని చెప్పు సన్నాసులకి.

ఇక మాట్టాడ్డం అనవసరమని సెక్రెటరీ నోరు మూసుకుంది. ఆ రాత్రి సీకాంగీసు నాయకులు సెక్రెటరీ ఇంటికెళ్ళారు మళ్ళీ. ఆమె చెప్పింది, "మేడం గారు ఒబామాతో మాట్టాడుతూ ఇవ్వాళంతా బిజీగా ఉన్నారు. రేపు, ఎల్లుండి కూడా బిజీనే. ఆవలెల్లుండి ప్రయత్నించి చూద్దాంలెండి."
దీనంగా ఉన్న సీకాంగీసు నాయకుల మొహాలు ఆ చివరి మూడు మాటలతో తళుక్కున మెరిసాయి. సోదియా ఇంటి దిక్కుకు తిరిగి సాష్టాంగ ప్రణామం చేసి, మూడేసి గుంజీళ్ళు తీసి బైటికి వెళ్ళిపోయారు. వెళ్ళేముందు సెక్రెటరీతో ’మేం ఇలా దణ్ణాలు పెట్టామని, మూడేసి గుంజీళ్ళు కూడా తీసామనీ మేడంతో తప్పకుండా చెప్పమ్మా, ప్లీజ్’ అని చెప్పి మరీ వెళ్ళారు.

ఆ సాయంత్రం విలేకరులతో మాట్టాడుతూ సీకాంగీసు నాయకులు ఇలా చెప్పారు: "మేం రాష్ట్ర విభజనను వాయిదా వెయ్యగలిగాం. ఎప్పుడో నెల కిందట మొదలవ్వాల్సిన పనులు ఇంకా మొదలు కాలేదు, చూసారా? విభజనను అడ్డుకుని తీరతాం చూడండి."

తరవాత కొద్దిసేపటికే, ఢిల్లీలోనే వేరే చోట, పరాజయ్ సింగు విలేకరులతో మాట్టాడుతూ, "విభజన ప్రక్రియను దేవుడు కూడా ఆపలేడు..." అని చెప్పాడు. టీవీలో అది చూసిన సీకాంగీసు నాయకు డొకాయన ’చిచ్ఛీ, మన ఊళ్ళకు వెళ్ళే అదృష్టం ఇప్పుడప్పుడే లేనట్టే’ అంటూ తల పట్టుకున్నాడు. ఇంకొకాయన, ’పార్లమెంటు ఆఖరి సమావేశాలు కూడా అయ్యాక, ఏకంగా అన్నీ సర్దుకుని ఎల్దాంలే. ఎన్నికల తరవాత ఢిల్లీ వచ్చే పని ఎలాగూ ఉండదు’ అని గొణుక్కున్నాడు.