నిర్హేతుక నిరర్థక నిష్ఫల సమ్మె

ప్రభుత్వ ఉద్యోగులు 40 రోజుల పైగా చేసిన సమ్మెను ఎట్టకేలకు విరమించారు. తెలంగాణ కోసం చేస్తున్నామని మొదలుపెట్టి, ముగింపు ఒప్పందంలో దాన్ని పెద్దగా పట్టించుకోకుండానే సమ్మెను ముగించేసారు. ఎందుకు మొదలుపెట్టారో, ఎందుకు చేసుకు పోయారో, ఎందుకు విరమించారో చూస్తే, ఇదంతా ఒక అయోమయ వ్యవహారంగా కనబడుతుంది.

ముగింపు ఒప్పందంలోని పది అంశాల్లోనూ తెలంగాణ ఏర్పాటు గురించి ఒకేఒక్క అంశం ఉంది.. "తెలంగాణ సమస్యను ముఖ్యమంత్రి ఇటీవల కేంద్రం దృష్టికి తీసుకెళ్ళారు" అని. ’తీసుకెళ్తారు’ అని కాదు, ’తీసుకెళ్ళారు’ అని రాసారు. చెయ్యాల్సింది ఈపాటికే చేసేసాం అని చెప్పిందన్నమాట, ప్రభుత్వం!  అంటే ఏంటి.. ఈ విషయంపై ఇక రాష్ట్ర ప్రభుత్వం చేసేది ఏమీ లేదనే! ఈ ముక్కను ఉద్యోగులు లిఖిత పూర్వకంగా ఒప్పేసుకున్నారు. ఒప్పందంలో ఉన్న మిగతా పాయింట్లన్నీ కూడా తమ ఉద్యోగ వ్యవహారాలకు సంబంధించినవే. 

సమ్మె చేస్తున్నన్ని రోజులూ నాయకుడు, స్వామి గౌడ్ ది ఒకటే గోల -’మేం మాత్రమే బరిలో దిగాం. నాయకులకు ఇదేమీ పట్టడం లేదు. మమ్మల్ని రంగంలోకి దించి, ఇప్పుడు మద్దతు ఇస్తామని పైపై మాటలు చెబుతున్నారు’ అని! ’మీరూ రంగంలోకి దిగండి’ అంటూ నాయకులను తిట్టాడు, విసుక్కున్నాడు, దేబిరించాడు. అయినా పనేం జరగలా! ఆయన చెప్పినదంతా నిజమే.. వీళ్లను ముందుకు తోసి, నాయకులు చోద్యం చూసారు. నాయకులు చెప్పారు గదాని వీళ్ళు ఎగేసుకుంటూ రంగంలోకి దిగారు. అసలుసంగతి వెంటనే అర్థమైపోయిన తరవాత కూడా, సమ్మెను ఎందుకు కొనసాగించాడు? ప్రజలను ఎందుకు హింసించాడు? -సమాధానాల్లేవు.

సమస్యను కేంద్రం దృష్టికి తీసుకెళ్ళడంలో మేం విజయం సాధించాం అని పైకి చెప్పుకుంటున్నారు. సమస్యను కేంద్రం దృష్టికి తీసుకెళ్ళడమే వీళ్ళ ఉద్దేశమైతే, అసలు సమ్మె చెయ్యడమెందుకు? కేసీయారు వెంట ఢిల్లీ పోయి అందరినీ కలిసి వచ్చారు కదా.. సమ్మె చెయ్యకుండానే వెళ్ళి అలా కలిసొస్తే పోయేది! పోనీ, సమ్మె చేస్తేనే ప్రభుత్వం దారికి వచ్చింది అని అనుకుంటే, ఢిల్లీ యాత్ర తరవాత వెంటనే సమ్మె ఎందుకు ముగించలేదు? ఆ తరవాత కూడా ఇరవై రోజుల పాటు ఎందుకు కొనసాగించారు? ఈ ఇరవై రోజుల్లో అదనంగా వీళ్ళు సాధించిందేంటి? ఏం లేదు. ఏమీ లేదు!

ఇవన్నీ చూస్తే ఈ సమ్మె ఉద్యోగుల స్వలాభం కోసం చేసినదే తప్ప,  తెలంగాణ సాధన కోసమో, ప్రజల కోసమో చేసింది కాదని స్పష్టమౌతోంది. లేకపోతే..  ముగింపు ఒప్పందంలో 610 జీవో గురించిన పాయింటు ఎందుకుంది? తెలంగాణ వచ్చే పక్షంలో అసలీ జీవో గురించి ఎందుకు ప్రస్తావించాలి? దాని కోసం ఎవరో ఒక జడ్జిని వెయ్యండి బాబయ్యా అని ఎందుకు కోరాల్సి వచ్చింది? ఇదే కాదు, ఒప్పందంలోని మిగతా అంశాలు చూడండి.. తమ జీతాలు, తమ అడ్వాన్సులు, తమ కేసులు, తమ సమ్మె కాలపు సర్వీసు, తమపై ఎక్కుపెట్టిన ఎస్మా, తమ కోసం తెచ్చిన జీవో రద్దు చెయ్యడం, ..  ఇలా ’తమ’ గొడవలే తప్ప తెలంగాణ గొడవే లేదు. పైకి మాత్రం తెలంగాణ కోసం సమ్మె చేసామని, లక్ష్యాన్ని సాధించామనీ పోసుకోలు కబుర్లు.

కాబట్టి సమ్మె చేసింది, ముగించిందీ తమ కోరికలు నెరవేర్చుకోడానికి తప్ప, తెలంగాణ కోసం కాదు. తెలంగాణ సమస్యకు సంబంధించినంత వరకూ ఇది నిర్హేతుక, నిరర్థక, నిష్ఫల సమ్మెయే!