శ్రీకృష్ణ కమిటీ నివేదికకు స్వాగతం!

శ్రీకృష్ణ కమిటీ నివేదిక వెలువడింది.  పెద్ద నివేదిక, దాంతోటి అనుబంధాన్నీ జాలంలో పెట్టారు.
నివేదిక: http://mha.nic.in/pdfs/CCSAP-REPORT-060111.pdf
అనుబంధం: http://mha.nic.in/pdfs/CCSAP-Appendix-060111.pdf

నేను చదివినంతలో గమనించినవివి:

ఒకటి: 'కమిటీ ఆరు పరిష్కార మార్గాలు చూపించి, ఎటూ తేల్చకుండా కొట్టుకు చావండని చెప్పింది' అనే విమర్శలో పసలేదు. చాలమంది రాజకీయ నాయకులు చేసారీ విమర్శ. ఆరు పరిష్కారాలను సూచించినా, ప్రతీ దాన్ని విపులంగా చర్చించారు. కొన్నిటిని కొట్టేసారు. అత్యుత్తమమేదో, రెండో ఉత్తమమైనదేదో కూడా చూపించారు. కమిటీ చెయ్యాల్సిన పని అదే, చేసిందీ అదే! అనేక వికల్పాలను చూపిస్తూ, ఎలిమినేషన్ ప్రాసెస్ ను అనుసరించి ఒక్కోదాన్నీ కోట్టేసి చివరిగా అత్యుత్తమ పరిష్కారాన్ని సూచించింది.
రెండోది: తెలంగాణ వెనకబాటుతనం అనేది నిజం కాదు, అని అంది. రాయలసీమ అత్యంత వెనకబడ్డ ప్రాంతం అని అంది. (నివేదిక పూర్తిగా చదివాక మరిన్ని వివరాలు తెలుస్తాయి.)
మరొకటి: ఈ నివేదికను తెవాదులు హర్షించరు. ప్రత్యేక తెలంగాణ తప్ప మరొక పరిష్కారాన్ని అంగీకరించం అనేవాళ్ళకు ఇది నచ్చదు.
ఇంకోటి: ఈ నివేదికపై ఆధారపడి ప్రభుత్వం నిర్ణయం తీసుకుంటే, ఖచ్చితంగా రాష్ట్ర విభజన చెయ్యకూడదు. అప్పుడు తెలంగాణ కాంగ్రెసు నాయకులు ఏం చేస్తారో చూడాలి. ప్రజలకు ఏం సమాధానం చెప్పుకోవాలో తెలీని గడ్డు పరిస్థితి వాళ్ళది. వారి హైకమాండే వాళ్ళను గట్టున పడెయ్యాలి.
చివరిది: ఈ నివేదికను తెలుగులో కూడా పెట్టాల్సింది. ఇంతమంది జనం ఇంత ఆసక్తిగా ఎదురు చూసిన నివేదిక, తెలుగులో ఉండకపోతే తెలుగువాడికి ఎలా తెలుస్తుంది?

ఇక కమిటీ సూచించిన పరిష్కారాల గురించి చూద్దాం:
నివేదిక చివర్న, ఆప్టిమల్ సొల్యూషన్స్/ఆప్షన్స్ అనే విభాగంలో కమిటీ వివిధ పరిష్కార వికల్పాలను చర్చించింది. ఒక్కో పరిష్కారాన్ని, దాని ప్రయోజనాలు, ఇబ్బందులనూ చర్చించింది. కమిటీ దృష్టిలో..
అన్నిటికంటే ఉత్తమ పరిష్కారం:  రాష్ట్రాన్ని సమైక్యంగానే ఉంచి, తెలంగాణ అభివృద్ధి కోసం రాజ్యాంగ ప్రతిపత్తి కలిగిన ప్రత్యేక అభివృద్ధి మండలిని ఏర్పాటు చెయ్యడం.
రెండో ఉత్తమ పరిష్కారం: ఉద్యమకారులు కోరుకున్న విధంగా రాష్ట్రాన్ని విభజించడం.

కమిటీ సూచించిన పరిష్కారాలు, వాటిపై అది చూపించిన మంచిచెడులు:
పరిష్కారం 1: యథాతథ స్థితిని కొనసాగించడం
ఆర్థిక ప్రగతి విషయంలో ప్రభుత్వం నిర్లక్ష్యం వహించిందన్న వాదన పట్ల సాక్ష్యాలేమీ కమిటీకి కనబడలేదు. అయితే, విద్య, ఉద్యోగాలు, సాగునీరు పట్ల ప్రజల్లో భయాలు కొనసాగుతూనే ఉన్నాయి. ఏ చర్యా తీసుకోకపోతే, తెలంగాణ ప్రజల్లో తీవ్రమైన ప్రతిస్పందన వస్తుంది. మావోయిస్టులు పుంజుకోవచ్చు. ప్రస్తుత పరిస్థితులను దృష్ట్యా, యథాతథ స్థితిని కొనసాగించడానికి కమిటీ సుముఖంగా లేదు. ఈ పరిష్కారం చిట్టచివరి వికల్పమే!

పరిష్కారం 2: రాష్త్రాన్ని సీమాంధ్ర, తెలంగాణలుగా విభజించడం; హైదరాబాదు కేంద్రపాలిత ప్రాంతంగా, అనంతర కాలంలో రెండు రాష్ట్రాలు తమ తమ రాజధానులను ఏర్పాటు చేసుకోవడం
పరిశీలన: ఈ పరిష్కారాన్ని సీమ కోస్తా ప్రజలు అంగీకరించినా, తెలంగాణ ప్రజలు దీన్ని అసలే అంగీకరించరు. తీవ్రమైన ప్రతిచర్య వచ్చే అవకాశం ఉంది. హై. చుట్టూ తెలంగాణ కు చెందిన రెండు జిల్లాలు ఉండటం వలన హై. కు రావలసిన సరఫరాలను అడ్డుకునే అవకాశం ఉంది. అందుచేత ఇది అనుసరణీయం కాదు.

పరిష్కారం 3: రాష్ట్రాన్ని రాయల తెలంగాణ, కోస్తా ఆంధ్ర రాష్ట్రాలుగా విడగొట్టడం - హైదరాబాదు, రాయల తెలంగాణలో అంతర్భాగంగా ఉండేలా.
రాష్ట్రవిభజన చెయ్యాల్సిన పరిస్థితే ఏర్పడితే, పరిష్కారం ఇలా ఉండాలని కొందరు సీమ వాసులు కోరుకున్నారు. ముస్లిములు కూడా ఇదే వికల్పాన్ని కోరుకున్నారు - కొత్త రాష్ట్రంలో ముస్లిములు 12 శాతం దాకా ఉంటారు కాబట్టి వాళ్ళు మరింత బలమైన రాజకీయ శక్తిగా ఏర్పడతారు.  మరొకటి: ఆర్థిక విశ్లేషణలో తేలిందేమిటంటే.., మొత్తం మూడు ప్రాంతాల్లోకీ రాయలసీమ అత్యంత వెనకబడిన ప్రాంతం. నీళ్ళ కోసం ఆ ప్రాంతం తెలంగాణపై ఆధారపడింది. పైగా వాళ్ళకు తెలంగాణతో సన్నిహిత సంబంధాలున్నాయి. ఈ కారణాల వల్ల సీమవాసులు రాయల తెలంగాణయే కోరుతారు. ఆర్థిక కారణాల రీత్యా ఇదే సరైన వికల్పం కూడా.

అయితే తెలంగాణ వాసులు, తమ వెనకబాటుతనానికి కారణం సీమనాయకులే ఒక ప్రధాన కారణమని నమ్ముతారు కాబట్టి వాళ్ళు దీన్ని ఒప్పుకోరు. తెలంగాణ నాయకులతో మా చర్చల్లో కూడా ఇది వెల్లడైంది. పైగా మత ఛాందసవాదులు తలెత్తేందుకు ఇది అవకాశమీయవచ్చు. ఈ కారణాల వల్ల ఇది అనుసరణీయం కాదు.


పరిష్కారం 4: రాష్ట్రాన్ని సీమాంధ్ర, తెలంగాణలుగా విడగొట్టడం, విశాల హైదరాబాదు కేంద్రపాలిత ప్రాంతంగా ఏర్పరచడం. ఈ కేంద్రపాలిత ప్రాంతానికి నల్గొండ జిల్లా ద్వారా కోస్తా ప్రాంతానికీ, మహబూబ్ నగర్ జిల్లా ద్వారా రాయలసీమకూ కనెక్షను ఉంటుంది.
ఈ ప్రతిపాదనను తెలంగాణలో గట్టిగా వ్యతిరేకిస్తారు. మిగతా ప్రాంతాల్లో కూడా అంగీకరించక పోవచ్చు. తెలంగాణలో మావోయిస్టులు పెచ్చుమీరే ప్రమాదం కూడా ఉంది.

పరిష్కారం 5: రాష్ట్రాన్ని సీమాంధ్ర, తెలంగాణలుగా ప్రస్తుత సరిహద్దుల వెంబడి విడగొట్టడం. హైదరాబాదు తెలంగాణకు రాజధానిగా ఉంటుంది. సీమాంధ్రకు కొత్త రాజధాని ఏర్పడుతుంది.
ఈ పరిష్కారంతో తెలంగాణ ఉద్యమకారుల కోరిక పూర్తిగా తీరినట్టౌతుంది. మా తెలంగాణ పర్యటనల్లో ప్రజలతో మాట్టాడినపుడు మేం గమనించిందిది: చాలా పెద్ద సంఖ్యలో ప్రజలు తెలంగాణ ప్రత్యేక రాష్ట్రాన్ని కోరుకున్నారు. గణనీయమైన సంఖ్యలో ప్రజలు తటస్థంగా ఉన్నారు. కొందరు ప్రత్యేకరాష్ట్రం పట్ల సుముఖంగా లేరు.
ఈ పరిష్కారపు పర్యవసానాలు ఎలా ఉండొచ్చంటే..
1. హైదరాబాదు, సాగునీటి సమస్య -వీటిపై కోస్తా సీమల్లో తీవ్రమైన ఉద్యమాలు తలెత్తవచ్చు.
2. ఆ ప్రాంతాల ప్రజలు తమ ప్రతినిధులపై వత్తిడి తెచ్చి, రాజీనామా చేయించి సమైక్యాంధ్ర కోసం ఉద్యమించవచ్చు.
3. అనుకున్నదానికంటే ముందే ప్రత్యేక సీమ, ప్రత్యేక కోస్తా రాష్ట్రాల కోసం ఉద్యమాలు తలెత్తవచ్చు.
4. సాగునీటి పంపకం కోసం స్వతంత్ర ప్రతిపత్తి గల సంస్థలను ఏర్పాటు చేసినా, కోస్తా సీమల ప్రజల భయాలు తొలగకపోవచ్చు.
5. నక్సలిజం పెరిగిపోవడం, మత ఛాందసవాదం పెరిగి అంతర్గత భద్రతకు ముప్పు ఏర్పడవచ్చు
6. ఇది దేశంలో ఇతర ప్రాంతాల్లోని ప్రత్యేక రాష్ట్ర ఉద్యమాలకు ఊతమివ్వవచ్చు.
7. చిన్న రాష్ట్రాలు ఆర్థికంగా ఇబ్బందులు ఎదుర్కొంటాయి. కోస్తా+సీమ రాష్ట్రం హై. అనే పెద్ద మార్కెట్టుకు దూరమౌతుందనే భయం అక్కడి ప్రజల్లో ఉంది. కోస్తా రాష్ట్రం ఆర్థికంగా దెబ్బ తింటుంది. తెలంగాణ + హైదరాబాదు రాష్ట్రం మాత్రం ఆర్థికంగా చాల బలమైన రాష్ట్రం అవుతుంది. చాలా ఇతర రాష్ట్రాల కంటే బలమైనదౌతుంది. 
8. ప్రస్తుతమున్న తీవ్ర ఉద్రిక్త వాతావరణంలో వాళ్ళ డిమాండును తీర్చని పక్షంలో రాబోవు పరిణామాలను (వాటిని సమర్ధంగా ఎదుర్కోలేని పక్షంలో )  దృష్టిలో పెట్టుకుంటే ఈ పరిష్కారం అనుసరణీయం. అన్ని అనుకూల ప్రతికూలాలను దృష్టిలో పెట్టుకుంటే ఇది అత్యుత్తమ పరిష్కారం కానప్పటికీ రెండో ఉత్తమ పరిష్కారమని భావిస్తున్నాం.

పరిష్కారం 6: రాష్ట్రాన్ని సమైక్యంగా ఉంచుతూనే, తెలంగాణ సామాజిక ఆర్థిక అభివృద్ధి కోసం, రాజకీయంగా బలోపేతం చెయ్యడం కోసం,   కొన్ని ఖచ్చితమైన రాజ్యాంగబద్ధ/చట్టబద్ధ చర్యలు చేపట్టడం - తెలంగాణ ప్రాంతీయ మండలిని ఏర్పాటు చెయ్యడం
ఇది అత్యుత్తమ పరిష్కారం ఐనప్పటికీ, తెలంగాణలోని కొన్ని వర్గాలు వ్యతిరేకించవచ్చు. రాజీనామాలు చెయ్యమని ప్రజాప్రతినిధులపై వత్తిడి రావచ్చు. ప్రభుత్వం వత్తిళ్ళు ఎదుర్కోవచ్చు. అయితే ఈ వర్గాలు ఈ పరిష్కారాన్ని పూర్తిగా అధ్యయనం చేసాక, వారు దీనిలోని మంచిని గుర్తించాక, వారి వ్యతిరేకత తేలిగ్గానే తొలగిపోతుంది. ఇటువంటి అభివృద్ధి మండలి మిగతా ప్రాంతాల వారూ అడగొచ్చు. ప్రస్తుత పరిస్థితుల్లో ఇదే అత్యుత్తమ పరిష్కారం.
=========================

అదీ సంగతి! నివేదికను ఇంకా పూర్తిగా చదవాల్సి ఉంది.