రాజశేఖరరెడ్డి మరణం, ఆ తరవాత

సంచలనాల జీవితం సంచలనంగానే ముగిసింది. అరవయ్యో యేట రాజకీయాలనుండి విశ్రాంతి తీసుకుందామనుకున్నా, అలా జరగలేదు. ప్రతి మనిషికీ తన జీవితంలో చేసిన పనులను, తను సాధించినవిజయాలను నెమరు వేసుకుని, తన తప్పొప్పులను సమీక్షించుకునే అవకాశం బహుశా వానప్రస్థంలో కలుగుతుంది. కానీ వై.ఎస్‌కు ఆ అవకాశం లేకపోయింది. ముఖ్యమంత్రిగా తీరుబడిలేని జీవితం గడుపుతూండగానే అర్థంతరంగా  జీవిత ప్రయాణం ముగిసింది. ఈ దుర్ఘటనలో మరణించిన ఐదుగురి కుటుంబసభ్యులకూ నా సానుభూతి.


24 గంటల వెతుకులాట తరవాత దుర్ఘటన స్థలాన్ని కనుక్కోగలిగారు. ఒక ముఖ్యమంత్రి కనబడకుండాపోతే కనుక్కోవడానికింతసేపా అని విమర్శలొచ్చాయిగానీ, బహుశా అది తప్పని ఆలస్యమేమో! ప్రమాదం జరిగిన ప్రాంతం ఎంతో దుర్గమమైనది కావడం, ఆ హెలికాప్టరులోని 'ఈయెల్టీ'యో ఏదో.., దాన్నుండి సిగ్నళ్ళేమీ రాకపోవడం, వాతావరణ ప్రతికూలత, ఇలాంటివన్నిటినీ దృష్టిలో పెట్టుకుంటే ఈ ఆలస్యం అర్థం చేసుకోదగినదే ననిపిస్తోంది. అయితే అసలు గాలింపు చర్యలు మొదలవడమే ఆలస్యం జరిగిందని ఒక ఆరోపణ ఉంది -దాని వివరాలు బహుశా రాబోయే రోజుల్లో తెలుస్తాయి.

ఇవన్నీ ఎలా ఉన్నప్పటికీ, ప్రభుత్వం బాగా పనిచేసినట్టుగా కనిపించింది. వేలాదిమందితో కూడుకున్న ఆదుకోలు జట్లను సమన్వయపరచడం, కనీసం మూడుచోట్ల యాక్షను కేంద్రాలను నిర్వహించడం, సహజంగా సంఘటన పరంగా ఉండే విపరీతమైన వత్తిడికి తోడు, ప్రజలు నాయకులు, మీడియాల వత్తిడి, దీనికితోడు సంఘటన పట్ల ప్రజల్లో రాగల రాకూడని స్పందన,  వీటిని తట్టుకుని రోశయ్య, రమాకాంతరెడ్డి పనులు చక్కబెట్టిన విధానం బాగానే ఉంది. 

టీవీల వార్తాప్రసారాలు మొత్తమ్మీద బానే ఉన్నాయి. మేం ముందు ప్రసారం చేసామంటే మేమే ముందు చేసామని చెప్పుకోడంలో పోటీ పడ్డారు. చర్చలు చాలావరకూ అర్థరహితంగా సాగాయి. కానీ హైలైటేంటంటే.. హెచ్చెమ్ టీవీవాడు వై.యెస్ గొంతుతో మాట్టాడించిన చివరి సందేశం..  చాలా ఉద్వేగం కలిగించేలా ఉంది. ఆ సందేశంలో ఒక భాగం.. "నేను దూరమైపోతున్నానని బాధపడుతున్నారా? బాధపడకండి.. నిండుగా నీళ్ళతో కళకళ్ళాడే ప్రాజెక్టుల్లో నేనే ఉంటాను. పేదవాడి ఇంటి వెలుగుల్లో నేనే ఉంటాను. ఆడపడుచుల కంటి వెలుగుల్లో నేనే ఉంటాను.."  (సరిగ్గా ఇదే కాదుగానీ, కొద్దిగా ఇలాగే ఉంటుంది.) ఇలా ఉద్వేగంగా సాగింది ఆ సందేశం.  

రాజకీయాలాట మొదలు.. 
ఓ పక్కన వై.యెస్ మరణించాడని తెలిసీ తెలీయగానే , రాజకీయాలాట మొదలైంది.  జగన్నే ముఖ్యమంత్రిని చెయ్యాలని డిమాండ్లు మొదలెట్టారు. కెమెరా ముందుకు రావడం, మైకు పట్టుకోని ఓ ఏడుపేడవడం, ఆపైన 'జగన్ ముఖ్యమంత్రి అయితే తప్ప ఈ రాష్ట్రానికి భవిష్యత్తు లేద'ని చెప్పడం -ఇదీ నాటకం. మంత్రులంతా ఒకచోట చేరి ఒకరి తరవాత ఒకరు ఇదే వరస! అలాగనక జరక్కపోతే మంత్రి పదవికి రాజీనామా చేసి పారేస్తామని కూడా ఒకళ్ళిద్దరు చెప్పారు. పదవి బదిలీ సమయంలో మరో అభిప్రాయం తలెత్తకుండా ముందే జాగర్తపడుతూ అధిష్ఠానమ్మీద పెడుతున్న వత్తిడిది.

ఆశ్చర్యమేమీ కలిగించడం లేదు కాంగ్రెసు నేతల స్పందన. చూద్దాం అధిష్ఠానం వివేకంతో వ్యవహరిస్తుందో లేక మనల్ని పెనం మీంచి పొయ్యిలోకి తోస్తుందో ! వివేకంతో వ్యవహరించడానికి రోశయ్య రూపంలో అవకాశం ఉంది కూడాను. ఎలాగూ ముఖ్యమంత్రిగా ప్రమాణ స్వీకారం చేయించారు (ఆపత్థర్మంగా) , ఆయన్నలాగే కొనసాగిస్తే బాగుంటుంది.

తాజా వార్త:  జగన్నే ముఖ్యమంత్రిగా చెయ్యాలని మంత్రివర్గం తీర్మానించిందంట.
ఇది ఆంధ్రప్రదేశ్ కోసం ఏర్పడిన మంత్రివర్గమా? లేక కాంగ్రెసు పార్టీ కోసం ఏర్పాటు చేసిన మంత్రివర్గమా?