చారిత్రిక అవసరం

అధికారమనేది లక్ష్యం కాకూడదు, అదొక మార్గం అంతే! అంటున్నాడు లోక్‌సత్తా నేత జయప్రకాశ్ నారాయణ. జాతినిర్మాణం, బిడ్డల భవిష్యత్తూ లక్ష్యాలు కావాలి. అధికారం -దాన్ని సాధించే మార్గం కావాలి. కానీ సాంప్రదాయిక రాజకీయ పార్టీలు అధికారాన్ని లక్ష్యంగా చూస్తున్నాయి అని అంటున్నాడు.

పోస్టాఫీసుల్లో వోటరు నమోదు కేంద్రాల ప్రయోగాత్మక ఏర్పాటు

పోస్టాఫీసుల్లో వోటరు నమోదు కేంద్రాలనేర్పాటు చెయ్యాలనే విషయమై లోక్‌సత్తా ఎప్పటినుండో అడుగుతోంది కదా... దీనిమీద ఈమెయిలు గోల కూడా చేసాం. ఈమధ్య జయప్రకాష్ నారాయణ ఎన్నికల ప్రధాన కమిషనరుతో జరిపిన చర్చల తరవాత దీన్ని ప్రయోగాత్మకంగా హై. లో అమలు చెయ్యాలని నిర్ణయించారని తెలిసింది. 

వోటరు నమోదు కేంద్రాలను పోస్టాఫీసుల్లో ఏర్పాటు చెయ్యండి!

మీకు వోటు హక్కుందా? ఉండే ఉంటుంది. మరి, వోటరుగా నమోదయ్యారా? అయ్యుండకపోతే, నమోదు చేయించుకోండి. త్వరలో ఎన్నికలు రాబోతున్నాయి. మన భవితను నిర్ణయించుకునే అవకాశమది -ఎలాగోలా నమోదు చేయించుకోవాలి మరి. అయితే, ఈ నమోదు వ్యవహారం పెద్ద తతంగంగా కనిపిస్తోంది. కుప్పుసామయ్యర్ మేడ్డిఫికల్టు లాగా వీలైనంత కష్టతరంగా చేసిపెట్టారు ఈ కార్యక్రమాన్ని. నమోదు చేయించుకోడానికి ఎక్కడికెళ్ళాలో తెలీదు, ఎప్పుడు చేయించుకోవాలో తెలీదు, ఏవేం కాగితాలు తీసుకెళ్ళాలో తెలీదు. దీన్ని సులభం చేస్తూ.. 'పోస్టాఫీసుల్లో నమోదు కేంద్రాల నేర్పాటు చెయ్యండి మహప్రభో' అంటూ లోక్‌సత్తా ఎన్నేళ్ళుగానో గోల పెడుతోంది.

నేను లోక్‌సత్తాకు వోటెందుకేస్తానంటే..

కాంగ్రెసూ, తెలుగుదేశం, భాజపా, తెరాస, అదీ, ఇదీ - అన్నీ పాలించడంలో విఫలమయ్యాయి.

• సభను రాజకీయాలమయం చేసారు: ఒకరిపై మరొకరు నిందారోపణలు చేసుకోవడం, ఎత్తులూ పైయెత్తులు వేసుకోవడం తప్ప, సభలో అర్థవంతమైన చర్చ జరపరు.

లోక్‌సత్తా పార్టీ అవసరమా?

అవసరమే!

లోక్ సత్తా పార్టీ ఏర్పడబోతోంది. పార్టీ పెట్టే విషయంపై రకరకాల అభిప్రాయాలు వినవచ్చాయి. నాకూ నా అభిప్రాయం రాయాలనిపించింది. ఓటేసే ప్రతీ ఒక్కరికీ ఈ విషయంపై అభిప్రాయం ఉండి తీరుతుందని నా ఉద్దేశ్యం.

లోక్ సత్తాకు వ్యతిరేకంగా వినవచ్చిన అభిప్రాయాలు : (నీలాలు నా వ్యాఖ్యలు)

1. సంఘ సేవ అంటూ మొదలెట్టి ఇప్పుడు రాజకీయాల్లోకి దిగడం ఏంటి? పైకి కబుర్లు చెబుతున్నారు గానీ, వీళ్ళు పైనుంచి దిగివచ్చిన వారేం కాదు. నిజమే సంఘసేవ అంటూ మొదలెట్టారు. కాని వాళ్ళ కార్యక్షేత్రం మాత్రం మొదట్నుండీ రాజకీయాలే గదా! అయినా.. సంఘసేవ చేస్తామని మొదలెట్టి ఇప్పుడు రాజకీయాల్లోకి దిగితే తప్పేంటి?
2. జయప్రకాశ్ నారాయణా, ఆయన చుట్టూ ఉన్నవారు అంతా ఒక కులానికే చెందిన వారు. ఇది ఒక కుల పిచ్చి పార్టీ కాబోతోంది. జయప్రకాశ్ నారాయణ చుట్టూ ఉన్నవారు ఆయన కులస్తులే అనే విషయాన్ని నిర్ధారించుకోవాలి. ఆ పార్టీ నడవడికను గమనించేందుకు, వారి విధానాలను పరిశీలించేందుకు ఆపై నిర్ణయం చేసుకునేందుకు మనకింకా దాదాపు మూడేళ్ళు సమయముంది. చూద్దాం ఎలా ఉండబోతున్నారో! ఇప్పుడే వద్దనడమెందుకు?
3. డబ్బు లేని రాజకీయాలు, అవినీతి లేని రాజకీయాలు, నేర మరకలు లేని రాజకీయాలు అంటూ ఉపదేశాలు చెప్పిన వాళ్ళు వీళ్ళు. నిజంగా అలాగే రాజకీయాలు నడపబోయినపుడు, వీళ్ళకు తెలిసి వస్తుంది, అవి లేకుండా రాజకీయాలు నడపడం ఈ రోజుల్లో కుదరదని. నిజమే, కష్టమే! కానీ నడుపుతానంటున్నాడు గదా, ఎలా చేస్తాడో చూద్దాం. చేస్తే అంతకంటే కావలసిందేముంది? చెయ్యలేకపోతే మనకు పోయేదేమీ లేదు కదా!
4. రామారావు లాంటి సమ్మోహకుడు ఉన్నాడు కాబట్టి తెలుగుదేశం పార్టీ జయప్రదం అయింది. అంతటి ప్రజానాయకుడు లోక్ సత్తాకు లేరు కాబట్టి అది విఫలమౌతుంది. అది లోటే! కానీ అంతమాత్రాన రాజకీయాలకు పనికిరారని కాదు గదా!
5. ఏసీ గదుల్లో కూర్చున్న వాళ్ళకు సామాన్యుల బాధలు తెలవ్వు ఇలాంటి వ్యాఖ్య ఒకే ఒక్కరు చెయ్యగా విన్నాను. ఆయన పీసీసీ అధ్యక్షుడు. మరెవరూ ఇటువంటి విమర్శ చెయ్యగా నేను వినలేదు. (అందుకే ఆయన కేశవరావు అయ్యారు.) దీని గురించి మాట్లాడ వలసిన అవసరం లేదు. ఇదొక పసలేని వాదన.
6. స్వయంగా తనే రాజకీయాల్లోకి దిగి, జయప్రకాశ్ నారాయణ తన విశ్వసనీయతను పోగొట్టుకుంటున్నాడు. "రాజకీయాలనేవి మంచివారు ఉండదగినవి కావు, అదో మురుగ్గుంట, పందులకు మాత్రమే అనుకూలం" అనే భావనతో మనమున్నాం. అంచేతే ఈ విశ్వసనీయత విషయం తలెత్తింది.
   

నా ఉద్దేశ్యంలో అన్నిటి కంటే ముఖ్యమైన అంశం ఒకటుంది..
ప్రస్తుతం మనకు రెండే శక్తులున్నాయి.. అయితే కాంగ్రెసు, లేదంటే తెలుగుదేశం. విధానాలు, అవినీతి, ఆశ్రిత పక్షపాతం లాంటి అవలక్షణాల్లొ ఈ రెంటికీ పెద్ద తేడా లేదు. ఇక కాస్తో కూస్తో నిబద్ధత కలిగిన కమ్యూనిస్టులు బలమైన శక్తి కాదు. ఈ పరిస్థితుల్లో మనకు ఒక మూడో శక్తి కావాలి. మూడో పార్టీ కాదు, ఒక శక్తి కావాలి. ఓటేసేందుకు మనకు మరో వికల్పం కావాలి.

నువ్వు అవినీతి పనులు చేస్తున్నావని ఒకపక్షమంటే, ఏఁ, నువ్వు చెయ్యలేదా అని రెండోది అంటున్న రోజులివి. కాదు అని ఖండించాల్సిన అవసరం కూడా వాళ్ళకు కనిపించడం లేదు. అంతలా బరితెగించి పోయారు. వీళ్ళకు ప్రజలంటే లెఖ్ఖేలేదు. 'ఈ ఐదేళ్ళ తరువాత మనమెలాగూ ఉండము, ఆపై ఐదేళ్ళ తరువాత ఎలాగూ తిరిగి వస్తాము' అనే ధీమా అధికార పక్షానిది కాగా, ఈ ఐదేళ్ళ తరువాత మనదే రాజ్యం అనేది ప్రతిపక్షం ధీమా! మూడో శక్తి ఉంటే ఆ ధీమా ఉండదు, కాబట్టి ఒళ్ళు దగ్గర పెట్టుకుంటారు.

లోక్‌సత్తా చెబుతున్న సిద్ధాంతాలను ఆచరణలో పెడితే అది మూడో శక్తి కాగలదనే నా నమ్మకం. అప్పుడు మన రాజకీయాలు మంచికి మళ్ళుతాయి. చూద్దాం, లోక్‌సత్తా మూడో శక్తిగా ఏర్పడుతుందేమో!

ప్రజలతో జయప్రకాష్ నారాయణ ఫోనాఫోని

ఇవ్వాళ - ఆగస్టు 6 ఆదివారం - సాయంత్రం 6 నుండి 7 వరకు టీవీ9 లో జయప్రకాష్ నారాయణతో ఫోను లో మాట్లాడే కార్యక్రమం జరిగింది. ప్రజలు నేరుగా టీవీ9కి ఫోను చేసి ఆయనతో మాట్లాడే కార్యక్రమం ఇది. మంచి వాగ్ధాటి కలిగిన ఆయన ప్రజల ప్రశ్నలకు చక్కగా సమాధానమిచ్చారు. తమ పార్టీ ప్రసక్తిని ప్రజల్లోకి తీసుకుపోయేందుకు ఆయన దీన్ని బాగా వాడుకున్నారు.

జేపీ చెప్పిన ముఖ్యమైన విషయాలివి.

• పార్టీపై ప్రజల స్పందన చాలా బాగుంది.
• ప్రజాస్వామ్యంలోను, పార్టీలోను నాలుగు విషయాలకు ప్రాధాన్యం..
• యువత
• మహిళలు
• చదువు పొందలేని వర్గాలు
• మధ్యతరగతి
• ప్రజల చుట్టూ రాజకీయం తిరగాలి.
• విద్య, ఆరోగ్యం కేంద్రంగా పాలన జరగాలి. సమాజంలో ఉపాధ్యాయుడు, ఆరోగ్య కార్యకర్త ముఖ్యమైన వారు.
• పార్టీకి మూలాధార సూత్రాలు..
• అతర్గత ప్రజాస్వామ్యం
• చందాలు కేవలం చెక్కుల ద్వారానే
• ఎన్నికల ఖర్చు కమిషను నిర్దేశించిన దానికంటే పైసా కూడా ఎక్కువ పెట్టం
  
• ఎన్నికల్లో సారా, డబ్బూ వంటి అవినీతికర పద్ధతులకు పాల్పడం
• ఒకవేళ మావాళ్ళే ఎన్నికల అవినీతికి పాల్పడితే, వాళ్ళను ఓడించమని మేమే ప్రచారం చేస్తాం.
• అయ్యేయెస్సులూ, మంత్రులూ, ముఖ్యమంత్రులు, ప్రధానమంత్రీ వీళ్ళు కాదు పెద్దవాళ్ళు.., ప్రజలు పెద్దవాళ్ళు. వీళ్ళంతా ప్రజలు చెప్పినపని చెయ్యాలి, చెయ్యమన్నప్పుడు చెయ్యాలి, వద్దన్నప్పుడు మానెయ్యాలి. రాజకీయాలను ప్రజల చుట్టూ తిప్పాలన్నదే లోక్‌సత్తా ఉద్దేశ్యం.
• రిజర్వేషన్లు: కుల ప్రాతిపదికన రిజర్వేషన్లు మరి కొన్నాళ్ళపాటు ఉండాలి. అయితే వాటిని క్రమబద్ధీకరించాలి. కుల, వర్గ విచక్షణ లేకుండా అందరికీ నాణ్యత గల చదువును ఇవ్వాలి.
• అక్టోబరు మొదటి వారంలో పార్టీ ఏర్పాటు.
• ఆగస్టు 9 న పార్టీ విధానాల ప్రకటన.
• పార్టీలో చేరాలన్న ఔత్సాహికులు ఆగస్టు 9 తరువాత, కింది చోట్ల సంప్రదించవచ్చు...
• ఉచిత ఫోను: 1 800 425 2979
• ఈ అడ్రసుకు ఉత్తరాలు రాయవచ్చు: పోస్టుబాక్సు: 100, హైదరాబాదు– 4
• జయప్రకాష్ నారాయణ ఇంకా ఇలా అన్నారు...
• పాలకులు సేవకులే.
• రాజకీయాల్లో మార్పు రావాలని ప్రజలందరికీ తెలుసు. కానీ అది వస్తుందనే నమ్మకమే వారికి లేదు.
• చెడ్డవాళ్ళ దుర్మార్గం కన్నా మంచివాళ్ళ మౌనం ప్రమాదకరం.
• చర్చలిక ఆపేసి, చర్యలు మొదలుపెడదాం.
• కార్యక్రమం చివర్లో రాష్ట్ర ఎన్నికల కమిషనరు ఏవీయెస్ రెడ్డి ఫోను చేసారు. ఎన్నికల కమిషను చేతకానిది అంటూ నిర్దాక్షిణ్యంగా అనేక అభాండాలు నాపైన వేసారు కదా, మీకది భావ్యమా? అని అడిగారు. దీనికి జయప్రకాష్ నారాయణ సూటిగా సమాధానం ఇవ్వలేదు. అయితే వోటరు పేర్లపట్టిక తయారీలో రాష్ట్ర ఎన్నికల కమిషను అధికారాలు పరిమితం అని మాత్రం చెప్పారు.

నేనివి అడగాలనుకున్నాను. ఎంత ప్రయత్నించినా లైను దొరకలేదు.

1. అధికార భాషగా తెలుగు అమలు విషయంలో, మాతృభాషలో విద్యాబోధన, తెలుగు భాషాభివృద్ధి విషయాల్లో మీ విధానం ఏమిటి?
2. అవినీతి విషయమై మీ అభిప్రాయాలు సుస్పష్టం. అయితే అవినీతి అంటని పార్టీలు ఇప్పటి రాజకీయాల్లో లేనే లేవు. మరి, ప్రస్తుత సంకీర్ణ యుగంలో మీ పార్టీ పొత్తుకు వెళ్ళాల్సి వస్తే.., ఈ అవినీతిమయ పార్టీలతో పొత్తు విషయంలో మీ విధానం ఏమిటి?

జయప్రకాష్ నారాయణ రాజకీయ ప్రవేశంపై తమ అభిప్రాయాలు ఎస్సెమ్మెస్సుల ద్వారా పంపమని టీవీ9 వాళ్ళు ప్రజలను అడిగారు. 93% మంది అనుకూలంగా స్పందించారు.

మంచి కార్యక్రమం. టీవీ9 కు అభినందనలు.

లోక్‌సత్తా రాజకీయ ప్రణాళికలు

లోక్‌సత్తా రాజకీయ పార్టీ స్థాపించనుంది. నూతన రాజకీయ సంస్కృతి ఆవశ్యకత కు సంబంధించిన వారి చర్చా పత్రాన్ని ఇక్కడ చూడొచ్చు. ఈ పత్రం చివర్లో ఉన్న కొన్ని వాక్యాలు..

-ఏ సమాజంలో అయితే నీతి తప్పిన వారు విజయం సాధిస్తారో,
-ఎక్కడైతే నేరస్తులు ఆరాధ్యులుగా మారతారో,
-ఎక్కడైతే విలువలు పతనమై అవకాశవాదం రాజ్యమేలుతుందో,
-ఎక్కడైతే అసమర్థ పాలన, ప్రజల ఉదాసీనత రాజ్యమేలుతుందో,
-ఎక్కడైతే అవినీతి సర్వత్రా తాండవిస్తున్నా కూడా పట్టించుకోకుండా తమకు కావల్సిన వాటా కోసం ప్రజలు అర్రులు చాస్తుంటారో

అక్కడ..

"వ్యవస్థకు సంబంధించిన పునస్సమీక్షకు సమయం ఆసన్నమైందని అర్థం"

అప్పుడు
తమ గురించి - తమకు సంబంధించిన వారి గురించి
తమ చుట్టూరా ఉన్నవారి గురించి - తమ కార్యకలాపాలకు సంబంధించి
అక్కడి పౌరులు అంతర్ముఖులు కావాలి

-క్లిట్‌గార్డ్, ప్రఖ్యాత సామాజిక శాస్త్రవేత్త.