మరింత దిగజారిన లౌకికవాదం

హిందూ వ్యతిరేక భావాలను పదేపదే నిర్లజ్జగా ప్రదర్శిస్తోంది లౌకికవాదం. 

బాబా రామ్ దేవ్ ఆరెస్సెస్ ఏజంటు

అన్నా హజారే ఆరెస్సెస్ ఏజంటు

ఇద్దరు పౌరులు తమతమ దారుల్లో చేస్తున్న ప్రజా పోరాటాల గురించి కాంగ్రెసు పార్టీ స్పందన ఇది. దోపిడీకి గురైన ప్రజలధనాన్ని వెనక్కి రప్పించడం కోసం, సదరు దోపిడీ దొంగలను పట్టుకుని చట్టానికి కట్టేసే వ్యవస్థ కోసమూ కృషి చేస్తున్నారు వాళ్ళు. అది కాంగ్రెసు పార్టీకి కంటగింపుగా మారింది. ముందు బతిమాలారు, చర్చలు జరిపారు. వాళ్ళు లొంగకపోయేసరికి ఇపుడు వాళ్లపైన దొడ్డిదారిన దాడి చేస్తోంది. విమానాశ్రయాల్లో ఎదుర్కోళ్లతో మొదలైన కాంగ్రెసు మార్కు రాజకీయం అర్థం పర్థం లేని ఆరోపణలు చేసేదాకా వచ్చింది.

సరే, వాదన కోసం.. వాళ్ళిద్దరికీ ఆరెస్సెస్సుతో సంబంధాలున్నాయన్న సంగతి నిజమేనని అనుకుందాం. ఉంటే ఏందంట? అందులో తప్పేంటి? ఏఁ.., అవినీతిపరుల్నీ లంచగొండుల్నీ దోపిడీగాళ్ళనీ ఎదిరించే హక్కు హిందువులకు లేదా? అక్రమాలను ప్రశ్నించే హక్కు హిందూ సంస్థలకు, హిందూ సాధువులకు లేదా? కాంగ్రెసు పార్టీ దొంగలు చేస్తున్న అవినీతి గురించి హిందువులు మాట్టాడకూడదనేది ఆ పార్టీ అభిప్రాయమా? అసలు హిందువులంటే ఏమైనా సమాజం నుండి బహిష్కృతులా?

అంతేకాదు, తమ మతపరమైన నమ్మకాలను దెబ్బతీస్తోంటే హిందువులు ఎదురు తిరగకూడదు. అలా చేస్తే వారిని నాజీలు, ఫాసిస్టులు అంటూ అడ్డమైన మాటలు అంటా రీ లౌకికవాదులు. హిందూ దేవతలను అసభ్యంగా చిత్రించి హిందువుల మనోభావాలను గాయపరచాడొక వ్యక్తి. తన తప్పులను కాచుకోలేక, కోర్టు వేసే శిక్షను తప్పించుకునేందుకు అతడు దేశం వదిలి పారిపోయి, మరో దేశంలో తలదాచుకున్నాడు. చివరికి ఈ రెండూ కాకుండా మూడో దేశంలో అనామకుడిలా గతించాడు. తాను ఏ దేశంలో అయితే పుట్టాడో ఆ దేశపు సాంస్కృతిక, ఆధ్యాత్మిక వారసత్వాన్ని ఎగతాళి చేసి, ప్రజల మనసులను గాయపరచినవాడికి విధి వేసిన శిక్ష అది. కోట్ల మంది ప్రజలు పూజించే దేవతలను కించపరిచినందుకు గాను అతడు తన తప్పు నొప్పుకుని చెంపలేసుకుని ఉంటే పుట్టినగడ్దమీద అతడికి ఆరడుగుల నేల దొరికి ఉండేది. జనం గుండెల్లో కుసింత చోటూ దొరికి ఉండేది. కానీ, అతడికి హిందువుల మనోభావాల కంటే తన వికృత మనోవికారాలే ముఖ్యమయ్యాయి. అందుకే క్షమాపణ అడక్కుండా ఈ దేశ చట్టాల నుండి పలాయనం చిత్తగించాడు. లౌకికవాదులకు, కాంగ్రెసులాంటి లౌకికవాద/మైనారిటీవాద పార్టీలకూ కూడా హిందువుల మనోభావాల కంటే అతగాడి వికృత చేష్టలే ముఖ్యమయ్యాయి. అందుకే ఆ పార్టీలు తమ స్పందనల్లో  - మత ఛాందసవాదులు అతడి జీవితాన్ని నరకప్రాయం చెయ్యడం చేత అతడు దేశం వదిలిపోవాల్సి వచ్చిందని, ఇలా అనామకంగా చనిపోవాల్సి వచ్చిందనీ బాధపడి పోయాయి. హిందువులను మత ఛాందసవాదులుగా చిత్రించాయి.

ఇంతకీ అతడికి భారత రత్న ఇవ్వాల్సిందేనని లౌకికవాదినని చెప్పుకునే కులదీప్ నయ్యరు చెప్పేసాడు. భారతీయుణ్ణని చెప్పుకోడానికి సిగ్గుగాను, హిందువునని చెప్పుకోడానికి రెట్టింపు సిగ్గుగానూ ఉందట ఇతగాడికి!