26, ఫిబ్రవరి 2008, మంగళవారం

పాలాభిషేకం!

మీరు గమనించే ఉంటారు.. ఇది పాలాభిషేకాల సీజను. మనమెవరినన్నా విమర్శించామనుకోండి.. వెంటనే ఆ బాధితుడికి పాలాభిషేకం చేస్తారన్నమాట!

తెలుగువాళ్ళం మనం - సాధారణంగా అవతలి వాణ్ణి అనుకరిస్తూ ఉంటాం. స్వతహాగా మనదైన దాన్ని ఛీత్కారంగా చూట్టం మనకలవాటు. అదే అవతల వాడు చేసే చెత్త పని కూడా మనం నెత్తినెట్టుకుని పూజిస్తాం, అణకువతో పాటిస్తాం. మరి, ఈ పాలాభిషేకాన్ని ఎక్కడ నుండి పట్టుకొచ్చాం? కొంపదీసి మనమే కనిపెట్టామా ఏంటి? ఒకవేళ మనమే కనిపెట్టి ఉంటే ఇది త్వరలోనే చస్తుంది లెండి. అది కలకాలం మనాలంటే దానికి పేరు మార్చి ఏదో ఒక ఇంగ్లీషు పేరు - "మిల్క్ పోరింగ్ సెరిమనీ" లాంటిదన్నమాట- పెట్టేస్తే కలకాలం అలా పడుంటుంది.

సరే.. విషయానికొస్తా. దివంగతులైన నాయకులు కాబట్టి, విగ్రహాలకు పాలు పోస్తున్నారు. బతికున్న వాళ్ళను విమర్శిస్తే ఏం చేస్తారో? అప్పుడు కూడా పాలాభిషేకాలు చేస్తారా? అలా చెయ్యాలని నేను పిలుపునిస్తున్నాను. అప్పుడే కదా మనకు వాళ్ళ మీద ఉన్న మహాభిమానం యావదాంధ్ర దేశానికీ తెలిసేది? ఉదాహరణకు, రాజశేఖరరెడ్డిని, చంద్రబాబునూ ఎవరన్నావిమర్శించారనుకోండి.. వెంటనే మనం పాల బూతుకెళ్ళి ఓ వందో వెయ్యో లీటర్ల పాలు కొనేసి వాళ్ళింటి కెళ్ళిపోవాలన్నమాట. అప్పుడు..

చంద్రబాబు: బావుంది, కానివ్వండి. ఎవ్వరు ఎవ్వరిని విమర్శించినా ఇలాగే పాలాభిషేకాలు చేసుకుంటూ ముందుకుపోండి. అన్ని పార్టీలవారూ ఈ పద్ధతి పాటించాలని, హెరిటేజ్ పాలు ఇందుకు శ్రేష్టమనీ మనవి చేసుకుంటా ఉన్నాను.

రాజశేఖరరెడ్డి: ఎవడబ్బ సొమ్మని పాలాభిషేకం చేస్తారు? లాగులేసుకున్నప్పటి నుండి నన్ను తిడుతూనే ఉన్నారు.. ఎప్పుడన్నా పాలు పోసారా నాకు? ఇప్పుడు కొత్తగా ఏంటిది? ఇదంతా చంద్రబాబు కుట్ర! తన పాల కంపెనీ బాగు పట్టం కోసం వేసిన ఎత్తిది. నేను మేళ్ళు చేసేది ప్రజలకు.., అంతే! ఈ పాలాభిషేకాలు జరగనిచ్చే ప్రశ్నే లేదు.

ఎమ్మెస్: ఆయన తన ఇంట్లో తలుపులన్నీ వేసేసుకుని, కుర్చీలో వెనక్కు వాలి, కాళ్ళు చాపుకుని, కుర్చీలోనే దాదాపుగా పడుకున్నట్టుగా కూచ్చుని ఉన్నాడు. టీవీ విలేకరొకడు ఎలాగో ఇంట్లోకి జొరబడి ఆయన్ని విసిగిస్తున్నాడు..

"ఏంటి సార్.., ఇలా ఇంట్లో కూచ్చుని తలుపులేసుకున్నారేంటి?"
"ఏం జెప్పమంటావయా? ఆ కేసీయారేమో మమ్మల్ని సన్నాసులు, చవటలు, దద్దమ్మలు అని తిట్టిండు కదా.. మా పార్టీ కార్యకర్తలకు బాధేసిందట. పాలాభిషేకం చేస్తామని వెంటపడుతుర్రు. ఒద్దురా, పాలు పోసుకుంటే ఆ జిడ్డు పోదురా, అట్టలు కట్టేసి, చీమలు పట్టేస్తాయిరా అని మొత్తుకున్నా వినటం లేదు. ఏం చెయ్యనూ? అందుకని ఇలా! అక్కడికీ.. 'కేసీయారు మనోడేలే, అతడో మాటన్నా మనం పట్టించుకోకూడదు' అని చెప్పా! వాళ్ళు వింటేగా.. పాల క్యాన్లు తీసుకుని వెంటపడ్డరు!"


మరి సినిమా అభిమానులు పార్టీల కార్యకర్తలకేమైనా తీసిపోయారనుకున్నారా?

'మహాస్టారు' జిడ్డు బాబు నటించిన "ముష్టి వెధవ" సినిమా విడుదలై రెండ్రోజులైంది. రాష్ట్రం మీద కొదిలిన 350 పెట్టెల్లోనూ 250 దాకా తిరుగు ప్రయాణపు ఏర్పాట్లలో ఉన్నాయి. ఇలా లాభం లేదని పెద్దయెత్తున సక్సెస్ మీట్ ఒకటి ఏర్పాటు చేసి హడావుడి చేసారు. మాజీ గవర్న రొకరినీ, రిటైరైపోయిన నిర్మాతొకణ్ణీ, మరో పది మంది భట్రాజుల్నీ పోగేసి, గొప్ప సభ ఏర్పాటు చేసి, తమ సినిమా విజయగాథను వినిపించారు. మరసటి రోజు పేపర్లలో ప్రముఖంగా వచ్చిందా వార్త. అయితే కొత్త కెరటం అనే ఒక పత్రికలో మాత్రం దాంతోపాటు ఆ సినిమాపై సమీక్ష కూడా వచ్చింది. ఈ కొత్త కెరటానికో తిక్క ఉంది.. నిజాలు రాసేస్తూ ఉంటుంది (వింతగా ఉంది కదా! తిక్క మరి, ఏం చేస్తాం!!). దాంతో పాపం సమీక్షను నిజాయితీగా రాసేసారు. ఇహ చూస్కోండి.. కలతచెందిన మహాభిమానులు ఊరూ వాడా ఏకం చేసి, పాల క్యాన్లు పట్టుకుని హైదరాబాదుకు వెళ్ళారు. 'అన్నయ్యా, నిన్ను విమర్శించిన కొత్త కెరటానికి తగిన శాస్తి చెయ్యాలి.. రా నీకు పాలాభిషేకం చేస్తాం' అని గోల చెయ్యసాగారు. బాబు బేజారెత్తిపోయి, సెక్రటరీతో '..ఇదేం గొడవయ్యా? పిచ్చి..లు తయారయ్యారు. ఏదో ఒకటి సర్ది చెప్పి పంపెయ్యి' అని బతిమిలాడాడు. ఆ సెక్రెటరీ అసాధ్యుడు.. తుఫాన్ను కూడా తన ఇంటి మీదకు రాకుండా పక్కింటోడి మీదకు మళ్ళించగల ఘనుడు; ఇలా అన్నాడు వాళ్లతో.. "కొత్త కెరటం తిట్టింది సినిమాను కదా.. అంచేత ఆ దర్శకుడికి అభిషేకం చెయ్యండి." అని ఎగేసాడు. ఇదీ నిజమేననుకుని అందరూ పొలోమని దర్శకుడి దగ్గరికి పోయారు.

అతడికప్పటికే సంగత్తెలిసి, రాష్ట్రమొదిలిపెట్టి పోడానికి బట్టలూ అవీ సర్దేసుకుని సిద్ధంగా ఉన్నాడు. పాపం కాస్త ఆలస్యమై వీళ్ళకి చిక్కిపోయాడు. వెంటనే రూటు మార్చి, "ఇదిగో ఇప్పుడే నిర్మాత దగ్గరికి పోతున్నాను. మన సినిమా గురించి నిజాలు రాసేసారు కదా, నాకెంతో బాధేసింది. అందుకని నేను ఆయనకు పాలాభిషేకం చెయ్యటానికి పోతున్నాను, మీరూ రండి" అని వాళ్ళను వెంటేసుకుని నిర్మాత దగ్గరికి పోయాడు. (ఈ మాత్రం సృజనాత్మకతను ఆ సినిమా క్కూడా వాడుంటే, అది మరో నాల్రోలు ఆడి ఉండేది)

ఆ నిర్మాత కూడా తక్కువోడేం కాదు. అసలే సినిమా పెట్టెలు తిరుగు ప్రయాణంలో ఉన్నాయని తెలిసి తిక్కలో ఉన్నాడు, ఆ పెట్టెలిక ఎలాగూ పనికిరావు. పైగా, వాటిని దాచి పెట్టడానికి స్థలం దండగ. ఇదంతా ఆలోచించి ఒక ప్లాను వేసాడు.. 'అభిషేకం నాకెందుకయా.. తిట్టింది సినిమాను కదా.. పొయ్యి ఆ సినిమా రీళ్ళకు చెయ్యండి, ఆ కొత్త కెరటం తిక్క కుదురుద్ది' అని చెప్పాడు. మహాబాబు గారి యువసేన అది విని బుర్రూపుకుంటూ పాల క్యాన్లు తీసుకుని సినిమా క్యాన్ల కోసం పరుగో పరుగు!

నీతేవిటంటే - మిమ్మల్నెవడూ తిట్టకుండా చూసుకోండి.. లేకపోతే మీ వీరాభిమానులు మీకు పాలాభిషేకాలు చేసీగల్రు!

15 వ్యాఖ్యలు:

  1. ఇంత చక్కగా రాసినందుకు, మమ్ములను ఆనందింప చేసినందుకు మీకు పాలభిషేకం చెయాలని ఉంది. ofcourse, ఖర్చు అంతా మీదే

    ప్రత్యుత్తరంతొలగించు
  2. మెత్తని చెప్పుతో బాగానే గడ్డిపెట్టారు ఈ క్షీరాభిషేకరాయుళ్ళకి.

    ప్రత్యుత్తరంతొలగించు
  3. చదువరి గారు,

    చిన్న పాయింట్ ని కామెడీ ట్రాక్ లో అద్భుతంగా వ్రాసారు. మీ బ్లాగ్ ని నా బ్లాగ్ లో (టూకీగా... పెట్టుకోవటానికి అనుమతించరూ...

    ~ సత్యసురేష్ దోనేపూడి.

    ప్రత్యుత్తరంతొలగించు
  4. క్రిష్ - :)
    వికటకవి, ప్రవీణ్: నెనరులు
    సత్యసురేష్, అనుమతెందుకండీ, పెట్టేసుకోండి. నా బ్లాగును మెచ్చినందుకు నెనరులు!

    ప్రత్యుత్తరంతొలగించు
  5. పవిత్ర బర్రె లకు (గోవు అంటే కంచ ఐలయ్యకు కోపమొచ్చిద్ది.) గేదె పాలతోని అబిషేకం చెయ్యాలన్నట్టు. పనిలో పని గోమూత్రం, గోమయంతో గుడక అభిసేకం చేస్తే శానా మంచిగుంటది.

    ప్రత్యుత్తరంతొలగించు
  6. సీరియస్ విషయాన్ని కూడా, వ్యంగ్యం గా,హాస్యంగా ఎంత చక్కగా చెప్పారండీ.బహుశా చదువరి బ్లాగులో కురిసిన తొలి హాస్య జల్లు ఇదేనేమో. Sponge చెప్పుతో గట్టిగా కొట్టినట్లుంది.

    ప్రత్యుత్తరంతొలగించు
  7. పాలు కూడా పేల్తాయని ఇప్పుడే అర్థమైంది సార్. సూటిగా చెప్తే ఏడ్చేవాళ్ళకి ఇలా చుఱకలు పెట్టడమే మందు. అయితే, మీ దగ్గర నేర్చుకోదగ్గవి చాలా ఉన్నాయన్నమాట.

    ప్రత్యుత్తరంతొలగించు
  8. కేక వుందండి.... బాగా నవ్వించారు...

    ప్రత్యుత్తరంతొలగించు
  9. అందరికీ ఒకేసారి పాలాభిషేకం బాగానే చేసేసారు బ్లాగులో..

    ప్రత్యుత్తరంతొలగించు
  10. చదువరి గారు అదరగొట్టారు కదా.. సూపరో సూప్ రు

    ప్రత్యుత్తరంతొలగించు
  11. అందరికీ నెనరులు.
    రావు గారూ, అయితే మీరు నా పాత జాబులు కొన్ని మిస్సయ్యారన్నమాట! (ఈ రకంగా నన్నా సైటుకు కాసిని హిట్లొస్తాయనిలెండి! ;))

    ప్రత్యుత్తరంతొలగించు
  12. చదువరిగారి లెఫ్ట్ బ్రెయిన్ రైట్ బ్రెయిన్ రెండూ కలిపి అక్షయ తుణీరాలు. ఇహ వారి శైలి ఇరుపక్కలా కొట్టగల సవ్యసాచిత్వమే!

    ప్రత్యుత్తరంతొలగించు

సంబంధిత టపాలు