అసలు నేరస్తులు

వరంగల్లు విషాదంలో రెండు సంఘటనలున్నాయి: ఒకటి యాసిడు పోసిన ఘటన, అందుకు దారితీసిన పరిస్థితులు, రెండోది పోలీసులు చేసిన ఎన్‌కౌంటరు.


యాసిడు ఘటనకు సంబంధించి తల్లిదండ్రుల బాధ్యత విషయంలో ప్రసాదం గారు చెప్పినదానితో ఏకీభవిస్తాను. తల్లిదండ్రుల బాధ్యతతో పాటు మరో ముఖ్య విషయాన్ని నేను ప్రస్తావించదలచాను. అది సినిమాలు, టీవీ, పత్రికలు. ప్రజాభిప్రాయాన్ని, సామాజిక ధోరణులను ప్రభావితం చెయ్యడంలో వీటి పాత్ర ఉపేక్షించరానిది.

గత ఏప్రిల్లో రాసిపెట్టుకున్న నా జాబును కొన్ని మార్పుచేర్పులతో, జాబులోని హాస్య, వ్యంగ్య ధోరణిని సవరించి, పెడుతున్నాను. నేరాల గురించి బ్లాగుల్లో చర్చ జరిగినపుడు ఆ జాబును పెడదామనుకున్నానుగానీ పెట్టలేదు. ఇప్పటి పరిస్థితికీ సరిపోతుంది.

~~~~~~~~~~~~~~~~~~~~~~~~~~~~~~~~~~~~~~~~~~~~~~~

మన సినిమాలు, టీవీలు, పత్రికలు మనిషిలోని నేరప్రవృత్తికి ఆజ్యం పోస్తున్నాయనేదాన్ని నేను నమ్ముతాను.
పంతుళ్ళను ఎగతాళి చేసే పిల్లకాయలు. అసభ్యకరంగా, అనాగరికంగా, వెకిలిగా  ప్రవర్తించే పంతుళ్ళూ పంతులమ్మలు,  కేవలం ప్రేమించుకోడానికి మాత్రమే కాలేజీలకి పోయే పిల్లలు. (కాలేజీయే కాదు బడుల్లో కూడా!) పదో తరగతిలో ప్రేమ. ఏడో తరగతిలో ప్రేమ, ఏడో యేట ప్రేమ! ప్రేమకోసం తల్లిదండ్రులను ఎదిరించే పిల్లలు. తండ్రిపై చెయ్యెత్తే పిల్లలు. ప్రపంచంలో ప్రేమ తప్ప మరోటి లేదని, జీవితానికి ప్రేమ తప్ప మరో పరమార్థం లేదంటూ ఇచ్చే సందేశాలు, ప్రేమ కోసం పోరాటాలు -ఇవీ నేటి సినిమాలు.

టీవీలు చూద్దామా... చిన్నపిల్లలతో, యుక్తవయసులో ఉన్న ఆడపిల్లలతో, ఆడా మగా పిల్లలతో వెగటు కలిగించే డాన్సులు, వెకిలి చేష్టలు. టీవీలు రాకముందు స్టేజీలెక్కి రికార్డింగు డ్యాన్సులేసే పిల్లకాయల్ని చూసామా? కాలేజీ అంటే ప్రేమ తప్ప మరోటి కాదనీ, కుర్రాళ్ళకు మొదటి అర్హత ప్రేమించటమేనని ఎవరు నేర్పారు మనకు? మగ స్నేహితులు లేని ఆడ జన్మ, ఆడ స్నేహితులు లేని మగ బతుకూ వ్యర్థమని భావించగలిగే స్థాయికి తెచ్చిందెవరు? ఇవన్నీ రైటేననుకునే కొందరు తల్లిదండ్రులకు ఆ ఆలోచనలిచ్చిందెవరు? రేయింబవళ్ళూ మనం చూస్తున్న ఆ సినిమాలూ, టీవీ కార్యక్రమాలది సింహభాగం! అంచేత వాటి పాత్ర ఈ పతనంలో చాలా ఉంది.

కొన్ని పత్రికల మూడోపేజీ గురించి మనకందరికీ తెలుసు. (కొన్ని పత్రికల్లో పేజీలన్నీ కూడా మూడో పేజీలేననుకోండి!) అలాంటి పత్రికలూ ఈ నేరంలో భాగస్తులే! ఓ విషయం చెబుతాను... డెక్కన్ క్రానికిల్ అనే ఓ (బూతు) పత్రికలో ఓ సారి ఓ వ్యాసం వచ్చింది. ఆడాళ్ళు అండర్‌వేరు కనబడేలా కూర్చున్నపుడు ఎలా కూర్చోవాలి, అప్పుడు ఆ అండర్‌గార్మెంటు రంగు, బయటి బట్టల రంగుతో పోలిస్తే ఎలా ఉండాలి అనే వ్యాసం రాసారు - బొమ్మలతో సహా! సిగ్గుందా వీళ్ళకి? నేను వాళ్ళకో ఉత్తరం రాసాను - వెయ్యలేదు, మామూలుగానే! టైమ్‌స్ ఆఫ్ ఇండియా అనే మహా బూతు పత్రికను కూడా చూసే ఉంటారు.

ఇప్పుడు తెలుగు పత్రికలకు కూడా విస్తరిస్తోందీ జబ్బు .సినిమా పేజీలో ఈనాడు వాడే భాష చూసారా? మిగతా పత్రికకలో వాడే భాషకూ ఈ పేజీలోని భాషకూ చాలా తేడా ఉంటుంది. పద్ధతైన పత్రికలు వాడే భాష కాదది. స్త్రీ సౌదర్యం గురించి మాట్లాడాలంటే అందం గురించి మాట్టాడాలి. అంతేగానీ అందాల గురించి మాట్టాడితే ఒక వార్తాపత్రిక స్థాయికి అది అసభ్యమే! ఆ పేజీలో ప్రచురించే ఫోటోలూ అంతే!

సినిమాల్లో వేసుకునే వేషాలు ఇప్పుడు బయట పార్టీల్లో కూడా వేసుకు తిరుగుతున్నారు హీరోయినులు. ఆ బాపతు జనం బజాట్టోకెళ్ళినపుడు ఎవడన్నా చెయ్యట్టుకు లాగాడంటే లాగడూ మరి!? దానికి, ఓ... బాధపడిపోతే ఎలా? మనం వేసుకునే డ్రస్సులు మన ఒంటితో పాటు మన వ్యక్తిత్వాన్నీ చూపిస్తాయి గదా! ఈ బట్టల్లో నన్ను మా తల్లిదండ్రులు, అన్నల్దమ్ములు, అక్కచెల్లెళ్ళు చూస్తే ఎంత నామర్దా అని అనుకోని వాళ్ళు బజాట్టో ఎవడో చెయ్యట్టుకున్నాడంటే బాధెందుకు? [ఏప్రిల్లో తిరపతిలో ఓ సినిమా హీరోయినుతో అసభ్యంగా ప్రవర్తించాడొకడు. ఈవిడగారు నేను పైన చెప్పిన దక్కనుక్రానికిలు వారి వ్యాసాన్ని అనుసరించి ఓ సినిమా పండక్కి వెళ్తే అప్పట్లో పెద్ద గోలైంది, కోర్టు కేసూ ఐంది. ఈ పేరా ఆ సందర్భాన్ని ఉదహరించి రాసినది.]
~~~~~~~~~~~~~~~~~~~~~~~~~~~~~~~~~~~~~~~~~~~~~~~
అసలు నేరస్తులు ఇలా స్వేచ్ఛగా సమాజంలో తిరిగేస్తూంటే ఎన్‌కౌంటరైపోయేవాళ్ళ, దాడికి గురై అసుపత్రుల్లో చేరినవాళ్ళ, అమ్మాన్నాన్నలు పాపం ఎలా అలమటిస్తున్నారో గుండెను పిండేసే ఈ వార్త చెబుతుంది:

ఎన్‌కౌంటరైపోయిన శ్రీనివాస్ తల్లిదండ్రులు అతడి శవాన్ని తీసికెళ్ళేందుకు నిరాకరించారు. 
వాళ్ళబ్బాయి చేసిన పని, అతడు తెచ్చిన అప్రదిష్ట, అతని జీవితం అంతమైపోయిన విధానానికి ఆ అమ్మానాన్నలు ఎంతగా క్షోభించారో పాపం! ఎంత కష్టం!
---------------------------------------------------------------------
ఇక ఎన్‌కౌంటరు గురించి: పోలీసులు చేసిన పని చట్టబద్ధంగాదు. వాళ్ళ విచ్చలవిడితనానికి నిదర్శనం. కానీ ఎన్‌కౌంటరు పట్ల నేను వ్యతిరేకంగా స్పందించలేకున్నాను. అలాంటి యాసిడు దాడి మరొకరు చెయ్యాలంటే ఈ ఎన్‌కౌంటరు తరవాత మరి కాస్త ఆలోచిస్తారు.

శిక్ష గుర్తొచ్చి నేరం చేసేవాడు ఆగుతాడా అని అనేవాళ్ళకు నాదో మనవి: క్షణికావేశంలో నేరం చేసేవాళ్ళ సంగతి పక్కనబెడదాం.. పదహారు సార్లు రిహార్సళ్ళు వేసుకుని మరీ దాడి చేసేవాడికి ఈ ఎన్‌కౌంటరు గుర్తొస్తే ఆగుతాడేమో!!